Sa Paghe in sos ojos de fiza mia.
de "lentore" Giovanni Piga de Busachi
(isterrida)
De sa paghe sos sinnos
chircadu apo pro annos
ma sempere m'est fuida
in su meu faghe faghe
jogat a incara-cua
ma como su jogare
de fiza mia biendo
sèzidi a part'e fogu
ch'iscardit s'aposentu
cun d'unu jogu nou
e sos peincheddos nuos
che anzonedda i su pradu
chi solu jogu 'idet
apo cumpresu totu
(ammantu)
de sa paghe sos sinnos
senza faer avolotu
mancari non si fidet
jeo la miro amajadu
bido sos ojos suos
e su jogare sou
sentz'unu pensamentu
chi l'istrobbet su jogu
e cunmoviu cumprendo
pustis tantu chircare
in s'innossentzia sua
Inie regnat sa paghe
s'armonia pius nodida
bramada dae sos mannos
ma in manu a sos pitzinnos.
