Sa Cogiua antiga po carrasegare
Unu ciu de Issirìa
su prus errìcu de ‘idda
Anca ‘olet a pobidda
Bailla s’ispuncièra.
In sa megnus primavèra
est issa picinna bella.
Cun sa sua parentella
gente pobera e onesta
arricint s’arrichiesta
de cussu cieddu ‘èciu
mancari tegnant disprèciu
ddu ‘olent pigare etotu,
ca Caicu pei trotu
tenet benes a muntone.
Cudda die in s’istradone
a calledda a ispassigiu
d’est benìu su disigiu
e de si dda domannare
e issa:”Lassami ‘annare
poite ses bèciu cadùcu;
su loroddu cun su mùcu
circa de ti ne brobbìre.
Ca seo ‘eo in s’avenìre
e tue in su passàu,
che un arbore sicàu
canno ti càrdio ses tue.
Lassami ci mi nne fue
ca depo torrare a domo
po sa proposta no dromo
ca mi ses partu invadente,
ca ci nos biet sa gente
no abbarro trancuilla”.
Torrat a domo Bailla
alluta che una frama
e ddu racontat su drama
lambriganno a fiotu.
“Caicheddu pei trotu
in s’istrada m’at frimàu
anca s’est innamoràu
e mi ‘olet po pobidda,
gia si nn’erriet sa ‘idda
canno ‘ènint a dd’issìre
ca no pòcio prus bivìre
nne perdo s’onore e fama”.
A babbu mutit sa mama
c’arrimau est in s’ungrone:
“No ddu perdo cust’ucone
ca nci no gia seo allìcu!.
“Pigadiddu ca est errìcu
e nos aconciat a totu
ca Caicu pei trotu
tenet dinàre e sienna”.
“Tanno ‘oleis ci mi ‘enna
ai custu cièddu ‘èciu?
E mancari a caru prèciu
e bos ap’acuntentare.
E tanno ap’acetare
cussa sua richiesta
prepàraemi sa festa
avisanno a s’Arretore
ca mi cogiuo cun dolore
de Sant’Antoni in cresìa.
Trista seo e afrigìa
e non seo cumprennenno
su ci oe seo faenno
ca no ddi tegno amore”.
Bannant an ca s’Arrettore
s’unione a cunfrimare,
canno sunti faci’a pare
no d’est partu mancu ‘eru:
“A bos cogiuare aberu
seis bènios fin’a innoe”?
Mì ! Ca corrudu che boe
podes crasa diventare.
Pencia de t’asseliare
abbandonadda s’idèa ,
ci nò ‘intras in pelèa
e no est cosa perfeta,
ca ti est che una neta
no est bellu a dd’isposare.”
Is sorgas si ‘etant apare
a melèciu e a tragagios,
si nn’at betàu a cagios
de parentes e invitàos.
Pustis ci si sunt calmàos
cena mancu ‘ogare mussu
e totus a murru russu
s’idd’aviant a s’Oficiu,
ca po cussu sacrificiu
iant a bòlet pregontare
ci dd’os pociant isposare
in civile matrimòniu.
Su sinnigu che dimoniu
fut betannosi a sa nega
is sorgas comente istrega
dd’anta a marolla cunvintu.
S’incrarat a fassa in chintu
po frimare s’unione,
sa canallia in s’istradone
cun lameris atripànno;
a tropas sunti arribànno
a s’intènnia’e su sonu
e ddi nanta : “e fae a bonu
e tocca e isposamidda
ca pobiddu cun pobidda
depent issos diventare”.
Mutit isposos a pare
e is testimognos puru
postu a palas a muru
s’unione dd’is sigilla
e Caicu cun Bailla
como si sunt isposaos.
Tota is tres biginaos
parentes e gente amiga
ca po custa cogiua antiga
anta fatu festa manna.
Issa trista e a una banna
manc’unu ballu s’at fatu;
issu inveces suddisfatu
s’ora ‘e finire non bie,
po abbarrare su merìe
solu cun Bailla sua
e po esset a sa cua
passanno note dileta.
Ddi ’ogat cipone e paleta
e pustis sa camisedda
issa frima e mischinedda
abbarrat in camisotu
e Caicu pei trotu
dad’in totu ispollincada.
Si nn’est ‘eretu agatada
ca non ddi funcionat nudda
e cun d’unu pramu ‘e ciudda
sinne pesat lastimosa,
e che verginella isposa
abbarrat innida e pura;
ca is leges de natura
‘olent sempre arrespetadas.
“Mi dd’apo pigàu ‘ebàdas
ca ‘olet solu cardiàu
e bestìu e samunàu
e totu sa die atènniu .
Coro!No apo cumprènniu
cann ‘apo nau ca emo.
Como che canna mi tremo
cena ‘uget membru sanu.
Ne ddu leo a Melanu
anca is mognas ddu lasso
gasi deo mi dd’ispasso
a destra e canno a manca
seo che vedovella bianca
ma de colores bestìa. “
Custa istoria est fantasìa
fata po carrasegare
ma si podet averare
atencione bellas mias.
Unu ciu de Issiria……
Bostianu Barracca
Desulu 1/3/2014
