A batter'annos fusti in Argentina
torrada ses a sa terra natia,
antadi: ses vera barbaricina.
Chi ti preguntant inue ses naschia
arresponne: "seo vera nuoresa,
in Tonara tegno sa familia".
Tenes nonna Frantzisca desulesa
e a nonnu Benigno in Tonara
chi ti cantat a sa tonaresa.
Unu bellu sonete a tie Sara
dd'iscriet cun sa sua manu
po s'arregodu de sa netta cara.
Si dd'at cantau a Olga in Milanu,
sa musa sua est sempere discreta
po tene cantat in Campidanu,
t'accumpagnat mamm'Antonietta,
po sa die totu at preparau
issa est puntuale e perfetta.
A fiancu unu Magistrau
assistinno a sa tesi preparada
e cun babbu unu bon'avvocau.
Cuntentos ti bient laureada
seberau as s'architettura
acoitu ti biant sistemada
progetanno e picanno musuras
e fininno operas de valore
premiente sa tua bravura.
Como fae progetos de amore
fortzis ses giai progetanno
e seberau t'as giai su frore
Cun su frore felitzes a chent'annos
custu est s'auguriu meu
dae su coro deo ti ddu manno
siat onnia gratzia de Deus
comente disigias aganzada
como perdona custu cantu feu,
Nonnu dd'at a giar'un'accontzada.
Zia Maria
Tonara 26 settembre 2013
Maria Peddio
