Funtanas Tonaresas.
Tonara, fiera bidda muntagnina
Parzida in tres istoricos foghiles
Ue s'arzant che turres campaniles,
Fruttadora ses de abba cristallina
Chi bundat in cresuras et rocchiles.
Sa Musa ch’has in sinu zenuina
Cum versos de sa mente subrafina
Sas venas nd'hat bantadu et funtaniles.
Funtanas friscas de abbas disizosas
In baddes et padentes murmuttande,
Virtudes, bantos s'istana cantande
Dae tempus antigu buttiosas;
Et parent limbas mudas faeddande
Cum amigas pintadas mariposas,
Suspiros de bajanas et isposas
Che puzones sididos ciulande.
Tintinnos de sas artes faineras
Melodias de armonicu istrumentu
Chi mastros de balente antigu istentu,
Faghent tinnire in domos et carreras.
Cada die saludant sas aeras
Discurrent cum muinas de su entu
De penas, de premuras et turmentu,
De bramas de zovanos et isperas.
De minores, in vida primu anelu,
De mamas caros ninnos de amore;
Pispisos de piantas in fiore
Cando bestit beranu birde velu.
Zoghittant cum sa luna a su crarore
De isteddos ch'ischentiddint in su chelu
In s'artu firmamentu, a su rezelu,
Cando incrarit sa notte de lugore.
A s'istranzu, chi pasat ventureri,
Istraccu, affadigadu et sididu,
Offerint de licores su cumbidu
Cum sonos de ischiglias de ferreri;
De turrones su gustu saboridu,
De castanza arrostida in su braseri,
De nughes et nunzolas in tazeri
Chi sanant su disizu a su famidu.
Ricchesas de sa fertile muntagna
Ch'istiddat riccas linfas naturales,
Totùe, beneittas sanant males,
A tristos coros nd’allirgant s'intragna;
Die et notte, cun rios et canales
Alimentant s'assura 'e sa campagna
Dd’abacant, cando suffrit, sa siccagna;
Sustentant piantas, feras, animales.
Mai drommint, in motu ma continu,
Annos, vidas de mundu ammentande,
De pastores chi bizant, sonniande,
Medint fruttu de massaios fainu.
Su passu in mes'e pedras traessande
Ponent fatu a prim'eternu destinu;
Fuinde ch'a s'omine, su caminu
Che finint tristu, in su mare zessande.
Ogos lughentes sunt friscas funtanas,
Canzones sardas tambene sestadas
In chentu limbas de milli incontradas,
Lambrigas durches de terras nostranas;
Cad'annu benint cum bantu festadas
Et current versos de zentes lontanas,
Riende laras in bezzas fentanas,
Torrant in frore sas siccas annadas
02-03-2012 G.E. CANALISCU
