1-Provveditore
Cando nemancu bi fiat pensende
de che frundire camice e iscova
li mando dae Nuoro sa nova
l’iscrio ca si est pensionende;
vostè incredula fit e pende pende
ca si crediat chi fit galu in prova.
Ma si l’insisto ca sò Provveditore
“signora Piras non bind’at errore”
2- Sa bidella
Po no lassare vacante su postu
fatt’appo de rinnovu sa domanna
nende : “sò sa bidella pius manna
e innoghe abbarro a donzi costu;
ca so de corzu corriatzu e tostu
e no mich’ido fuliada in branna.
Ca poto dare ancora contributu
de Tonara e in totu s’istitutu”
3-Provveditore
Poite non m’iscurtat e ragiona
miret ch’est meta tantu disizzada
ca medas annos ses sacrificada
como si devet sezzer in poltrona;
abbarret calma tando e ‘istet bona
e si godat sa vida ‘e pensionada.
Duncas si pighet como su caminu
comente a Piero Sau e Gesuinu.
4- Sa bidella
Nono! ca deo cheri’abbarrare
po non lassare a issas a sa sola
mi timo si manc’eo cust’iscola
non potat pius bene funzionare;
ca so ancora in sa menzus vola
e mi la sento galu’e trabagiare.
Ma cussa die signor Provveditore
li podiat pigare su puntore !!!
5- Provveditore
Sigomente so un omine drittu
bene app’ isvoltu su meu dovere
lis appo fatu finas piaghere
po mantenner s’organicu’e dirittu;
timenno de no tenner in podere
su postu chi calecunu fit afflittu.
Duncas bona est istetia s’idea
e namos “morte tua vita mea”.
6- Sa bidella
Tantis su dannu ormai l'at fattu
e non si podet torrare dae segus
si dae s'iscola m'at dadu s'isfratu
non cretat chi mic'agate peus
ma si m'agiudant sos santos e Deus
su mundu mi giro in dogni latu.
Vostè abbbarret in s'offici'accorrau
comente unu leone ammasedau
non cretat chi mic'agate peus
ma si m'agiudant sos santos e Deus
su mundu mi giro in dogni latu.
Vostè abbbarret in s'offici'accorrau
comente unu leone ammasedau
7- Provveditore
Ca est femina furba e intelligente
no mi cumbenit pius a provocare;
cann’andat a sa Posta a prelevare
sos pagos soddos chi li passat s’Ente
una pensione misera iscadente
at a esser custrinta a s’accordare.
Ma dd’auguro chi Deus dd’aggiude
chi si dd’at godat in paghe e salude.
8- Sa bidella
Bastat po como est ora’e la finire
mancari atteras cosas narrer poto,
vostè continuet s’iscola a servire
inveces deo m’ispasso cun Toto;
cun sa collana ,borsetta e cappotto
besso in giru po mi divertire.
Tenet ora vostè de appeddare
nudda non mi nde podet importare.
1- Augurios
Como de mama, muzere e mannai
faghe tota sa die a tempus prenu,
pigadi naves , aereos e trenu
e visitadi a Londra e-i Shangai;
po non ti poder annoiares mai
godidi donzi panorama amenu.
E dogni ‘orta chi finis sa gita
passa in iscola e nos abbisita .
2- Augurios
Tando saludo in custu festinu
prima chi si che fetat tropu tardu:
Laura , Carlo e s’infante Riccardu
Carla,Gian Carlo, Lorenzo e Martinu
ma devo tenner finas riguardu
po Franca ,Giuseppe e Samuelinu.
A Toto a tie puru a bonucoro
s’attera festa a sas nozzes de oro.
3- Augurios
Fininde cust’iscena curiosa
fatta cun versos candidos che lizos,
prega chi d’ogn’isposu cun s’isposa
in Tonara che fetant chimbe fizos;
po appagare a nois sos disizos
chi siat donzi classe numerosa.
Po atteros vint’annos c’an a bennere
po nos poder innoghe trattennere.
Bostianu Barracca
Ottadas po sa dispedida de Paola Piras dae bidella de s’iscola.
Tonara 8 de lampadas de 2013
