Cust’articulu,
de Pier Luigi La Croce ,
intitulau “Poesia e religiosidade populare”, est essiu in italianu in s’Arborense,
su giornale de sa Diocesi de Aristanis in su mese de arbile del su 2010. Pier Luigi La Croce etottu dd’hat furriau
in sardu po ddu poder ponnere in custu situ. Ddu lassaus comente issu dd’hat
iscrittu.
POESIA E RELIGIOSIDADE
POPULARE
Benigno
Casula est un’omine, distintu in su faere e de modos gentiles, chi est naschiu
e bivit in Tonara. Tenet ottantanoe annos e po meda tempus hat fattu su pane po
ddu ‘ennere. Cun grabbu e cortesia serviat a tottus is chi annànt a su forru
suo in su iginau de Arrasulè.
Is
pitzocheddos chi donnia mignanu annaiant a iscola, intrànt innanti in sa
buttega sua e ddi naiant aboginanno: “Tìu Benigno ‘aiènnòsi ùnu panerùssu”;
e acoa nne poniant cussu pane fraganno e ancora caente, chi fut s’immurgiu
issoro, aintro de su su bogittu, e si nn’annaiant a brincos.
Su fragu bellu de su pane de Tiu Benigno si intenniat in
tottu is camminos e is istrintorgios de su ‘iginau antigu de Funtàna
Ìdda. Prus ainnanti de su forru de Tiu Benigno ddu est
su camminu, chi si naiat s’Orrùga ‘e sa Maestràntza, inue fut naschiu Peppinu Mereu. E a
pagu trettu dae cui ddu-e fut sa ‘omo de Dottor Sulis, cuddu Nanni Sulis,
dottore e beneffadore, amigu de su poeta, e chi chena si nne sapire como est
connotu in medas logos ca est po issu chi Mereu, tanno giovoneddu e
insufferente in sa ‘idda sua, haiat iscrittu cuddos versos de Nanneddu
meu chi, annos medas acoa, cun sa musica de Tonino Puddu, ddos hant
connotos in donnia logu a su puntu chi calecunu pentzat chi Nanneddu
Meu siat s’innu nazionale de is Sardos.
Tiu
Benigno, como est fiudu e non faet prus su
panatteri ma non ddi mancat cudd’antigu ischire trattare cun sa gente chi
s’arte sua incantosa dd’imponiat; e tenet is lintzolas e ponet s’ortu e ligget
e iscriet poesias mancari in medas connoscant prus a Tìu Orrofèle Casùla, unu
frade suo, cantadore finas issu, chi est est mortu dae unos cantos annos e chi
haiat pubblicau prus de unu libru de poesias. Ma chi sa gente connoscat prus a
Orrofele non ddi dispraget. Antzis est orgogliosu de cussu frade chi haiat
pigau paritzos premios e si fut distintu in medas cuncursos de poesia.
Ma
issu tenet un’atteru modu de iscriere, prus a a sa manu, prus comunu fortzis e
is versos ddos iscriet ponenno paris rimas e foeddos comente chi siat
ammesturanno sa farra po faere su pane. Po custu is poesias de tiu Benigno,
nessi is chi hapo potziu lìggere, tenent cussu fragu bellu e sa lebiesa de su
pane appenas ‘ogau dae su forru.
Fortzis
ca daghi iscriet pentzat chi a chie hat a lìggere cussos versos est comente a-i
cuddu fedu ch’intraiat a boges in su forru nannoddi: “Tiu Benigno ‘aiennosi ùnu
panerussu”.
E
issu, Tiu Benigno, ancora oe chistionat cun tottus e pigat calesiat paragone. Est abbonau a s’Arborense e ligget
s’articulu de Totore Frau chi trattat de poesia. Nos hat mannau dae pagu una cantzone, cosa sua, chi hat
postu po sa Cresia de Santa Nostasìa, sa chi fut in s’antigu iginau de Toneri
in Tonara e chi noso pubblicaus cun pragere:
TONARA A
SANT’ANASTASIA
|
TONARA A SANT’ANASTASIA
|
Tonara Anastasia hat onoradu
|
Tonara Sant’Anastasia ha onorato
|
sutt’e Toneri amena zona
|
sotto il rione di Toneri, in luogo ameno,
|
sa cresia li hat inie fraigadu
|
li la chiesa a lei ha innalzato
|
e po seculos fit issa sa patrona.
|
e per secoli fu le lei la patrona.
|
Pustis su Simulacru adottadu
|
Dopo che venne adottato il simulacro
|
inie est istada post’in trona.
|
li venne costruito anche il pulpito.
|
Fit unu faru sempr’illuminadu,
|
Era un faro che illuminava di continuo,
|
da’ Onnalè a Su Toni una corona.
|
da Gonnalè a Su Toni cingeva una corona.
|
Subra s’antiga e vistosa rocca
|
Sull’antica e panoramica rocca
|
restana muros ‘e s’isterrimenta
|
restano i muri delle fondamenta
|
de sa Cresia, sacru monumentu.
|
della Chiesa, sacro monumento.
|
Tonara ancora a issa s’invoca(t),
|
Tonara ancora a lei si invoca,
|
de su sou martiriu si nd’ammenta(t)
|
del suo martirio conserva la memoria
|
ca sa morte dae Floro hat ottentu.
|
giacchè da Floro ebbe la morte
|
Custos
verso de Tiu Benigno Casula funti
sestaos a sa manera de is sonettos prus nodios. Si biet ca a ddos iscriere hat
postu contiviggiu cardianno finas a s’istoria de sa ‘idda e de cudda Santa,
martire cristiana, chi dae sempere is tonaresos ddi tenent affetzione.
Santa
Nostasia, antzis Santa Nosta come dda tzerriant is de Toneri, chi a issa funti
devotos aberu, po meda seculos est istada sa patrona de sa ‘idda: e po
seculos fit issa sa patrona, iscriet Tiu Benigno. Sa cresia, chi como ddu-e funti in pè solu is muros de
anca fut s’artare, dd’hiant fraigada in d-unu cucuru de s’ischistu a colore ‘e
prata, in d-unu montigu chi s’accrariat a s’Isca, s’adde chi arribbat finas a
su sartu de Brebì; “Subra s’antiga e vistosa rocca”, nat
ancora s’autore nostu.
Sa
Cresia de Santa Nostasìa, a seguru, fut
istda fraigada innanti de su XIV seculu e fut connota poi is tres arcos goticos
cun is tres bovidas arcadas da inue penniant cosa ‘e perdas mannas chi sa gente
ddi si naiat “is campanèddas”. Acoa, sa cresia, abbellu abbellu, fut
istada iscavulada e nn’est orrutta de su tottu bie su milleottoghentoschimanta.
Cosa meda dae inie, perda, mattone e linna, funt istaos pinnigaos e umperaos po
fraigare e accontzare sa cresia noa de Santu Crabiele e sa ‘e Sant’Antoni. S’istoria
de comente sa cresia de Santa Nosta fut istada abbandonada est ancora cosa chi
non s’ischit bene; un’istoria chi Padre Giovanni, su preide de Tonara, est
cricanno de nne ‘ogare a campu liggenno cun passientzia is paperis prus antigos
chi funti in s’Archiviu de sa Cresia. Su sonetto de Tiu Benigno si serrat
lumenanno unu fattu de s’istoria chi trattat de su martiriu de sa santa: Tonara
ancora a issa s’invoca(t),/ de su sou martiriu si nd’ammenta(t)/ ca sa morte
dae Floro hat ottentu.”. Bidaus tanno de connoschere prus bene
s’istoria de Sànta Nòsta. Nostasìa, pitzoca de is prus donosas
de tanno, fut figgia de Protestato e de Fausta, amaduos non cunvertìos a su
Cristianesimu. Issa fut istada fatta cristiana paris cun sa mamma dae Crisogono
chi fut su maistu suo. Morta sa mamma, su babbu dd’hiat obbrigada, finas chi
issa non cheliat, a si coiare cun d-unu donno romanu chi si mutiat Publio. Nostasìa
costumaiat a aggiudare a is poberos ma canno su pobiddu dd’haiat ischippiu
dd’haiat accorrada in domo. S’Imperadore Diocletzianu, in cussu tempus, haiat
mannau a Pubblio ambassadore in Persia e Nostasia fut ibettada suttaposta a
Codisso, un’omine orudu chi teniat s’ordine de dda faere mòrrere abbellu
abbellu. Ma a cantu Publio si fut mortu de ubitu, Nostasia fut torrada fasìa e
haiat torra cumentzau a aggiudare a chie teniat bisognu. Po more de custu,
però, fut istada suspettada de essere cristiana e tanno nne dd’haiant leada a
su Prefetto Floro (ma segunnu calecunu istoricu non fut Floro ma un’atteru chi
ddi naiant Probo), chi haiat tentau chena nn’arrennesere de dda faere annare
contras a sa religione chi haiat abbratzau. Finas s’imperadore Diocletzianu
haiat cricau de dda tomere, ma chena nn’arrennessere. Tanno nne dd’haiant
torrada anca fut Floro e custu dd’hiat propostu de dda liberare bastes chi
dd’esset giau a issu tottu su bene. Ma issa dd’hiat arrespostu ca non teniat
prus nudda ca su chi teniat dd’hiat giau a is poberos. Tanno Floro nne dd’hiat
posta in presone. Apustis de unu mese is chi dda cardiaiant fiant ibettaos
ispantaos ca issa, puru senno in presone, si fut fatta prus bella de innanti. Tanno Floro haiat detzidiu de dd’otziere,
mannannoddedda paris cun atteros chentubinti presoneris in d-una barca chi acoa
haiat fattu affunnare. Ma Nostasia si fut trabada po meraculu de Santa Teodota.
Floro, sempere prus airau, tanno nne dd’haiat fatta leare a s’isula de Palmaria
inue, su bintichime de nadale de s’annu 304, fut istada brusada a bia. Su corpus de Nostasia innanti fut istau
interrau in Zara e acoa, in s’annu 406, leau a Costantinopoli. Podet essere chi
sa veneratzione a Santa Nostasìa in Sardigna siat cumentzada po more de is
Aregos Bizantinos ma custu importat pagu. Contat invetzes chi su cultu po sa
Santa, apustis de chentuchimant’annos chi sa cresia nn’est orrutta, si
mantegnat ancora in Tonara. E paragonanno custu mi benint a conca is versos
bellissimos de una pregadoria antiga tonaresa inue si foeddat de custa santa:
E ÀVE MARÌA DE GRÀTZIAS PRÈNA
|
AVE MARIA
PIENA DI GRAZIA
|
E àve Marìa
de gràtzias prèna
|
Ave Maria
piena di grazia
|
e àve Marìa
pàgat arrecréu.
|
Ave Maria
ripaga con la gioia.
|
dàe ùna segnòra
est incarnàdu Déus
|
Da una
Signora si incarnato Iddio
|
dàe una
Segnòra e ùna mèla frìsca,
|
da una
signora ed una mela fresca
|
Sànta
Nastasìa s'est fàtta maìsta
|
Santa
Anastasia si è fatta maestra
|
e a mànu sùa
s'hat giàu sa pèna
|
e di sua
mano si è data la pena
|
e àve Marìa
de gràtzias prèna
|
Ave Maria
piena di grazia
|
E àve Marìa
sa pèna s'hat giàu
|
Ave Maria la
pena si è data
|
e a su
massàu dd’hat giàu s'aràu
|
al contadino
ha dato l’aratro
|
e a su
pastòre dd’hat giàu s'agnòne
|
al pastore
ha dato l’agnello
|
e a su
prèide dd’hat giàu littèra
|
ed al prete
ha dato la scrittura
|
e àve Marìa
de gràtzias prèna …
|
e Ave Maria
piena di grazia
|
